بيئة جيدة هي من الضروريات لأي مبرمج, و من بين الاشياء اللي كادخل فبيئة جيدة هي good terminal. فهاد المقال غانتعرفو على كفاش تقاد terminal ديال windows إبان إحترافي بالإضافة أنه غايوفر ليك معلومات إضافية ك إسم ل branch اللي نتا فيه, معلومات git و العديد من الأشياء الاخرى.
خاصك windows 10 فما فوق.
تحميل و تثبيت Windows Terminal
اول خطوة هي تقوم بتثبيت windows terminal من خلال Microsoft Store. هادا Terminal من طرف Microsoft كايدعم فتح عدة نوافد بالإضافة إلى أنه قابل للتعديل. كايضم العديد من الخصائص اللي مكاينينش ف Terminal العادي ديال windows.
التعديل في الإعدادات
فتح Windows Terminal ضغط على السهم اللي كاين الفوق حدا علامة الزائد ثم ضغط على Settings
من بعد, غادي تباليك نافذة جديدة تفتحات فيها الإعدادات ديال Windows Terminal, غانقومو بتغيير 2 حاجات:
1- في Default profile ختار Windows PowerSell.
2- في Default terminal application ختار Windows Terminal. ( إلى مالقيتيش هاد الإختيار ماشي مشكل)
3- ضغط على Save و غلق كلشي.
تحميل و تثبيت Nerd Font
هاد ل Font هي اللي غاتعطينا دوك الايقونات و الالوان اللي كايبانو ف terminal.
دخل لهاد الموقع غاتلقا العديد من ل Fonts حنا اللي مهتمين بها هي FiraMono Nerd Font قم بتحميلها و تثبيتها.
تحميل و تثبيت Oh-My-Posh
قم بفتح Windows power shell بصلاحيات ل Admin ثم اكتب هادا السطر:
Set-ExecutionPolicy RemoteSigned -scope CurrentUser
هنا بدلنا ل Execution policy ديال powershell باش مايمنعناش ملي نبغيو نخدمو oh-my-posh.
الان غانقومو بتثبيت oh-my-posh:
Install-Module oh-my-posh -Scope CurrentUser
ربما powershell إسولك واش متأكد من أنك باغي تثبت oh-my-posh كتب Y إلى كان عندك ل PC باللغة الأنجليزية او O إلى كان عندك باللغة الفرنسية. المهم قرا و غاتفهم. و ضغط على enter باش إكمل.
الان غلق powershell و فتح windows terminal.
غادخل للإعدادات اللي دخلنالهم من قبل و تضغط على open JSON file أولا Ouvrir le fichier JSON كاينا لتحت فالجانب الايسر, غايتحل ملف فيه الاعدادات ديال windows terminal بحث على profiles ثم defaults كيفما كاتشوفو فالصورة.
بين المعقوفات ديال defaults غانضيفو هاد ل code اللي لتحت:
"font": { "face": "FiraMono Nerd Font" }
ثم دير حفض و غلق الملف. هنا كانقولو ل windows terminal باش يستعمل ل font اللي تبثنا من قبل.
المرحلة الاخيرة.
الان غانعطيو ل powershell بعض الاوامر باش إشغلها فكل مرة كانفتحوه بالإضافة ل Theme باش بغيناه يخدم.
notepad $PROFILE
غايتفتح ليك ملف ببرنامج notepad حط فيه هاد 2 ديال الاسطر 👇 و دير حفض للملف و غلقو.
Import-Module oh-my-posh Set-PoshPrompt -Theme jandedobbeleer
الان غلق windows terminal و عاود فتحو تسنا شويا باش powershell إجهز الإعدادات اللي خاصينو, هادشي غير أول مرة من بعد غايولي إتفتح بسرعة. النتيجة غاتكون كيفما كتشوفو فالصورة لتحت 👇.
jandedobbeleer هو إسم Theme اللي كاتشوفو فالصورة ☝️
إلى بغيتي تشوف Themes اللي كاينين, كتب ف powershell
Get-PoshThemes
غايطلعوليك themes اللي كاينين ف oh-my-posh بالاسماء ديالهم:
شوف theme اللي بغيتي و دير سميتو فبلاصت jandedobbeleer.
وصلنا لنهاية المقال, بالصحة و الراحة terminal الجديد و إلى اللقاء فمقال أخر.