Authentication و Authorization مصطلحان قراب من بعضهم في النطق و حتى في المعنى لأنهم بجوجهم طرق لحماية الأنظمة و تأمينها, هادشي كايشكل صعوبة في فهمهم و التفريق بينهم.
Authentication :
في أي نظام كايكون عندنا مجموعة من المستخدمين, هاد المستخدمين باش إسجلو الدخول كايقدمو معلومات اللي كاتبث الهوية ديالهم , مثلا البريد الإلكتروني و الرقم السري. النظام كايطابق المعلومات اللي تعطاو ليه مع المعلومات اللي كاينين فقاعدة البيانات باش يتأكد من الصحة ديالها. هاد العملية تسمى بال Authentication, بمعنى أن ل Authentication هي عملية إثبات الهوية.
الطرق المستعملة في ال Authentication :
كاينين العديد من الطرق المستعملة لإثبات هوية المستخدمين, هادو بعض الطرق الأكثر إستخداما :
-
Email and password :هاد الطريقة من أقدم الطرق, المستخدم كايستعمل البريد الإلكتروني و الرقم السري الخاص به باش يثبت الهوية ديالو. -
Magic Link :فهاد الطريقة النظام كايرسل رابط خاص للبريد الإلكتروني ديال المستخدم, ملي المستخدم كايبرك على داك الرابط كايتم إثبات هويته. -
one-time password (OTP) :هنا كايتم إرسال رقم أو رمز سري للمستخدم في البريد الإلكتروني أو في رسالة نصية لرقم هاتفه,هاد الرقم أو الرمز صالح لإستعمال واحد , المستخدم كايقدم هاد الرقم للنظام باش يثبت الهوية ديالو. -
Fingerprint :المستخدم كايتبث الهوية ديالو بإستخدام بصمة الإصبع. -
Face ID :المعروفة أيضا بFace Recognition, هاد العملية كاتمكن المستخدم من إثبات هويته بإستخدام وجهه.
Authorization :
هاد العملية كاتم من بعد ال Authentication , أي أن المستخدم ثبت الهوية ديالو و النظام كايعرفو. عملية ل Authorization كاتمكنا من أننا نعرفو مستوى الصلاحيات اللي عند هاد المستخدم, بمعنى واش عندو الحق باش يدير شي فعل أو يوصل لشي معلومات.
مثال :
لنفترض عندنا نظام خاص بمحل بقالة, كل شخص فهاد المحل عندو مجموعة من الصلاحيات:
-
البائع :عندو الصلاحية يشوف إسم و صورة و ثمن السلع المعروضة للبيع و أيضا إنشاء الفواتير للزبائن. -
المسؤول عن المخزن :عندو الصلاحية يضيف السلع للنظام و أيضا حذف السلع من النظام (مثلا السلع الفاسدة أو اللي إنتهت مدة صلاحيتها) و أيضا إشوف الكمية المتوفرة من كل سلعة. -
المسؤول عن المحل :عندو الصلاحية ينشئ الحسابات الخاصين بالبائعين و المسؤولين عن المخزن و كذلك حذفهم, و أيضا عندو الصلاحية يشوف العمليات اللي قامو بيها كل من البائع و المسؤول عن المخزن -
مالك المحل :عندو جميع الصلاحيات, منها إنشاء الحسابات و الإطلاع على المبيعات و الأرباح...
هذا مثال بسيط عن ل Authorization باش توضح الصورة.
خلاصة :
كيف ما قلت, ل Authentication و Authorization إقدرو إبانو بحال بحال, لكن كل واحد و الدور ديالو في حماية و تأمين الأنظمة. إلى بغينا نبسطو الشرح نقدرو نقولو أن ل Authentication كاتسولك من أنت ؟ , و ل Authorization كاتسولك ما هي صلاحياتك ؟ .
مسألة الأمن , مسالة مهمة بزاف في أي نظام و خاص التعامل معاها إكون بحذر, لأن أي خطئ إقدر إكلفك ثمن باهض.