الإستضافة كاتعتابر مشكل كبير, سواء بغيتي تحط الموقع أو المشروع ديالك في ارض الواقع اولا غير بغيتي تستاضف الموقع ديال شي كليان باش إشوف العمل ديالك. أو ربما نتا عاد كاتعلم أو بغيتي إستضافة فين تجرب أو تكتاشف و تعلم أشياء جديدة. لكن المشكل كاين فالفلوس, حيت أنت كمبرمج خاصك إستضافة اللي تساعدك تحقق أي حاجة بغيتي, يعني كانهضرو على 5 دولارات في الشهر كأدنا ثمن. فهاد المقال غانتعرفو على طرق باش تحصل على إستضافة مجانية بالإضافة لمعلومات مهمة بزاف.
1- vercel
vercel هي الشركة اللي قادات nextjs, بالإضافة لإستضافة المواقع اللي مقادة ب nextjs, بإمكانك أيضا تستخدم react , vue , angular , vit , svelt ... أو المواقع اللي مقادة غير ب html css و javascript. هاد vercel كاتقدم إستضافة مجانية للمبرمجين بإمكانك تحصل عليها بكل بساطة, فتح حساب في الموقع الخاص بهم و هانتا ناضي. باش تحط الموقع ديالك عندهم خاصك تحطو بعدا في Github و تربط الحساب ديالك في github مع vercel, من بعد هوما كايطلعوليك repos اللي عندك , ختار اللي بغيتي تستاضفو و هوما كايتكلفو و كايقادوليك حتى ل ssl. و أجمل حاجة عجباتني هي أنه فكل مرة كادير شي تعديل فالموقع ديالك, غير كادفع داك التغيير ل main branch, هوما كايقومو تلقائيا بإعادة النشر باش إبانو التعديلات اللي درتي.
الإشتراك المجاني سميتو Hobby plan , كايبقا مجاني مدا الحياة مدام أنك ما تجاوزتيش الحدود.
2- amazon aws.
بطبيعة الحال شكون اللي مكايعرفش شركة amazon لكن هنا مكانهضروش على موقع amazon فين تشري السلعة. هنا كانهضرو على ل cloud. بالنسبة اللي مكايعرفش شناهو ل cloud : بكل بساطة هو مراكز كبيرة في جميع انحاء العالم كايقدموليك servers بإمكانك تستأجرهم بالإضافة لخدمات واجدة, ما تحتاش تقادها لراسك. كمثال smtp servers الخاصين بإرسال emails أو servers خاصين بتخزين الملفات أو servers خاصين بالدكاء الإصطناعي ... و العديد من الخدمات الأخرى. amazon aws كايقدم أكثر من 200 خدمة جاهزة.
amazon aws كاتعطيك خدمات مجانية لمدة 12 شهر لكن في حدود. مثلا EC2 اللي عبارة عن RDP يعني server دير فيه ما بغيتي و بإمكانك تدخل ليه بإستخدام sftp او ssh . كاين أيضا S3 bucket اللي هي عبارة عن server خاص بتخزين الملفات و الصور بالإضافة أنه بإمكانك تستخدمو باش تستاضف مواقع اللي فيهم index.html هو النقطة الرئيسية, الحد هو 5GB. كاينين أيضا خدمات مجانية دائما و بدون حدود و كذلك خدمات مجانية دائما لكن في حدود.
amazon aws معقد شويا و لكن إلى تعلمتيلو تقدر تحقق بيه أشياء رائعة. العديد من الشركات كايقلبو على ناس اللي كايعرفو إخدمو في aws. بإمكانك تدخل لهاد الموقع و تقرا داكشي اللي باغي و إلى نجحتي amazon غايعطيك Certificat اللي تقدر تحطها في CV ديالك. كاينين بعض certificats اللي بالفلوس.
google cloud
google cloud حتا هيا بحال amazon aws لكن بالنسبة الإشتراك المجاني, كاتعطيك 300 دولار صالحة ل 3 أشهر. هنا الفرق هو أنه في aws إلى بغيتي تستخدم شي خدمة مداخلاش في الإطار المجاني خاصك تخلص , عكس google cloud اللي كاتعطيك 300 دولار بإمكانك تشري بها أي خدمة بغيتي. لكن كايبقا المشكل ديال المدة اللي قصيرة بزاف. من جانب أخر, المصادر ديال التعلم بالنسبة ل aws أكثر بكثير من المصادر ديال التعلم بالنسبة ل google cloud.
digitalOcean و Linode
هادو حتا هوما cloud لكن كايعتابرو راسهم بساط, يعني مامعقدينش بحال aws و google cloud. كايقدمو عدد قليل لكن كافي من الخدمات باش تقاد داكشي اللي باغي بكل بساطة و بلا حريق الراس. بالنسبة للإشتراك , كايعطيوك 100 دولار صالحة ل 3 اشهر. الصراحة فترة كافية باش تجرب و تعلم.
النهاية :
كاينين العديد من الطرق الأخرى لكن انا حاولت ندكر أهمهم. إلى كنتي باغي تنشر الموقع ديالك بإمكانك تستعمل vercel من أجل إستضافة الموقع ديالك و s3 bucket ديال aws باش تخزن الصور إلى كان الموقع ديالك كايحتاج تحط فيه محتوى بإستمرار. بإمكانك أيضا تستخدم cloudfront الخاصة ب aws اللي هي خدمة عبارة عن cdn content delivery network باش تنقص الضغط على ل s3 bucket حيت aws كايعطيوك مليون request مجانية كل شهر و خدم ec2 باش دير فيها database أولا إلى كنتي غاتخدم ب mongodb را الشركة اللي صنعات mongodb حتا هوما دايرين إشتراك مجاني مدى الحياة. المهم غاتبدا ب 0 درهم لواحد العام ولا أكثر حتى تكبر المشروع ديالك و إولي عندك دخل, ديك الساعة إلى خلصتي جات معاك.
كانتمنا تكونو ستفدتو من هاد المقال. عارف أنني ما شرحتش شي حوايج ولكن را عطيتك النقطة منين تبدا. و كيف ديما إلى كان عندك تساؤل أو بغيتي مساعدة تواصل معانا في فيسبوك.