كيف تحمي نفسك من النصب في العمل الحر

العديد من المبرمجين ولاو كايفضلو العمل الحر على العمل مع الشركات , و هادشي راجع للحرية اللي كايقدمها العمل الحر , بالإضافة للربح المالي اللي يقدر يتخطى الأجر ديال الشركة بعشر أضعاف أو أكثر, هادشي بلا ما ندكرو إمكانية تطوير العمل و إنشاء شركة في المستقبل. لكن المشكل اللي كايتربص بهاد المبرمجين هو النصب و عدم أخذ أجرة عملهم , هادشي كايسبب الإحباط , لكن فهاد المقال غانتعرفو على بعض السبل و الطرق باش تحمي نفسك من هاد النصب و تتأكد أنك غتاخد الأجرة ديالك.

وضع النقط على الحروف :

في النقاش ديالك مع العميل خاصك تكون صارم و ما خاصكش تخليه يلعب ليك على جانب العاطفة , بالإضافة لأنه خاص الحوار إكون مفصل بحيث كاتطرقو فيه لجميع المحاور :

• فكرة عامة : يعطيك فكرة عامة على المشروع اللي باغي .

• المتطلبات : شنو المتطلبات ديالو, خاصك تدون كلشي, و إلى العميل طلبليك شي حاجة مستحيلة أو غير منطقية خاصك تقولهاليه و ما توافقش باش تتجنب المشاكل من بعد.

• المدة الزمنية : غاتافقو على المدة الزمنية اللي كاتناسبكم باش توجد المشروع.

• الفلوس : هنا الموضوع كايكون على حسب حجم المشروع و المدة الزمنية, إلى كانت المدة الزمنية أكثر من أسبوع , كانصحك تقوليه يقسم ليك الأجرة لمراحل , مثلا كل 3 أيام أو أسبوع إلى كان المشروع غايحتاج شهور , غاتوريه فين وصلتي و شنو حققتي و غايعطيك جزء من الأجرة.

حماية نفسك بالقانون :

من بعد النقاش مع الزبون خاصك تقاد عقد اللي كاتطرق فيه لنوع و تفاصيل الخدمة, و تدون فيه جميع متطلبات العميل بالإضافة للمدة الزمنية و ثمن الخدمة.مع العلم أنه كاينين عدة نماذج ديال العقود في الأنترنيت , إلا أن الأمر بسيط, كل ما عليك هو تكتب داكشي بطريقة باينة.

من بعد غاتمشي أنت و العميل للمقاطعة و غاتدي معاك 3 نسخ, نسخة كاتبقا عندك و نسخة عند العميل و نسخة كاتبقا في المقاطعة.

هاكا كاتولي عندك شي حاجة قانونية باش تحمي راسك.

لكن في حالة كان العميل بعيد أو إمكانية إنشاء عقد مستبعدة. غاتحتاج تحمي راسك بنفسك.

حماية نفسك بأسلحتك الخاصة :

العميل دائما غايكون محتاج إشوف النتيجة و إجرب العمل بها باش يعرف واش داكشي هو هداك , هادشي من حقو حيت حتا هو خاصو يحمي راسو. لكن حتا أنت خاصك تحمي راسك و تتأكد من أن العميل مغايهربش ملي تعطيه المشروع اللي طلب.

بالنسبة للمشاريع اللي كاتحتاج Server باش تشتغل مثل المواقع الإلكترونية و ل API :

بالنسبة لهاد النوع ديال المشاريع, ملي تبغي ترسل للعميل الشكل النهائي , كانصحك تستاظف المشروع في منصة مثل vercel أو netlify و أرسل ليه الرابط .

هاكا غاتحمي راسك و فنفس الوقت العميل غايقدر إشوف النتيجة ديال المشروع اللي طلب منك. و بطبيعة الحال حتا يخلصك عاد غاترسل ليه الملفات ديال المشروع.

بالنسبة لتطبيقات الهاتف أو Desktop :

هنا خاصك ترسليه التطبيق باش يقوم بالتثبيت ديالو و يجربو. لكن إلى العميل حصل على التطبيق راه يقدر ينصب عليك. لذلك باش تتجنب هادشي كاينين 2 حلول:

1. غاتبرمج التطبيق باش يدير طلب ل API خاص بيك كايسول واش يخدم ولا لا, إلى كانت الإجابة true التطبيق غايخدم عادي , و إلى كان العكس, التطبيق مغايخدمش. هاكا بإمكانك توقف التطبيق عن العمل فوقاش ما بغيتي.

2. إلى مكانش عندك API خاصك بيك , بإمكانك تستعمل هاد ل API ديال الوقت و التاريخ اللي كايعطيك الوقت و التاريخ الحالي.

الإجابة ديالو كاتكون على هاد الشكل :

{
  "abbreviation": "+01",
  "client_ip": "105.67.130.134",
  "datetime": "2022-05-20T13:33:15.205851+01:00",
  "day_of_week": 5,
  "day_of_year": 140,
  "dst": false,
  "dst_from": null,
  "dst_offset": 0,
  "dst_until": null,
  "raw_offset": 3600,
  "timezone": "Africa/Casablanca",
  "unixtime": 1653049995,
  "utc_datetime": "2022-05-20T12:33:15.205851+00:00",
  "utc_offset": "+01:00",
  "week_number": 20
}

مثلا بغيتي تعطي للعميل 3 أيام باش يجرب التطبيق, غاتبرمج التطبيق باش يتاصل بال API و ملي تحصل على الإجابة غاتشوف واش التاريخ اللي جا في ل API أكبر من التاريخ اللي بغيتي فيه التطبيق يحبس عن العمل, إلى كانت true التطبيق مغايخدمش . هاد الطريقة كنت دائما كانديرها قبل ما نقاد API ديالي.

أنا كانخدم ب electronjs في إنشاء تطبيقات Desktop و هذا مثال على ل code اللي كنت كانستعمل.

async function canRun() {
  try {
    const res = await fetch(
      'http://worldtimeapi.org/api/timezone/Africa/Casablanca'
    );
    const data = await data.json();
    let currentDateTime = new Date(data.datetime);

    if (currentDateTime > new Date('2022-5-23')) {
   // إلى كان الوقت الحالي أكبر من 23/5/2022 التطبيق مغايشتاغلش
     closeApp();

    } else {
    // إلى كان العكس التطبيق غايشتاغل
      runApp();
    }
  } catch (error) {
  // إلى مكانش إتصال بالإنترنيت غايحصل خطئ و مغايشتاغلش التطبيق
    throw error;
  }
}

النهاية :

العمل الحر عندو العديد من الإجابيات و كذلك السلبيات , و التعرض للنصب أحد هاد السلبيات, و حماية نفسك كاتبقا المسؤولية ديالك, خاصك تتاخد إجرائات باش تحمي نفسك. كانتمنا تكونو ستافدتو من هاد المقال.