كيف تضع مشروعك في Github بإستعمال Git

بدون نقاش خاصك تكون كاتعرف تخدم ب Github و Git, لأن إنشاء مشروع مكايعنيش انك تعرف غير اللغة ديال البرمجة , و إنما كايعني تعرف العديد و العديد من الأشياء اللي كاتدخل ضمن الخطوات الضرورية لإنشاء هاد المشروع.

في مقال سابق شرحت Git و كيفاش تخدم بها, كانصحك تقراه قبل ما تكمل فهاد المقال إلى ماكانتش عندك فكرة عليها.

شناهو Github ؟

Github هو منصة كاتوفر للمبرمجين القدرة على تخزين المشاريع البرمجية و أيضا التحميل و التعديل عليها . بإستخدام Github بإمكان فريق أي مجموعة من المبرمجين يخدمو على نفس المشروع و ذالك بإنشاء ما يسمى بالفروع branches. و من بعد كايقومو بدمج ديك الفروع مع الفرع الرئيسي.

وضع مشروعك في Github :

1️⃣ علاش خاصك تحط المشاريع ديالك في Github :

تخزين المشاريع فالحاسوب ديالك أو في قرص صلب خارجي, عملية غير أمنة , فأي لحظة تقدر تخسر كلشي. هادشي من غير أنها غير عملية و كاتطلب أن داك الحاسوب ولا القرص الصلب إكون دائما حداك. في حين أن Github بإمكانك توصل ليها من أي جهاز و من أي مكان.

المشاريع ديالك بإمكانك تجعلهم خاصين , بمعنى أنه أنت الوحيد اللي تقدر توصل ليهم , أو علنيين , أي واحد يقدر إشوفهم و إهزهم و يخدم بيهم.

حسابك على Github بإمكانك تحطو في السيرة الداتية ديالك باش أي واحد يعرف و يشوف المشاريع اللي خدمتي عليها و كذلك الحضور ديالك كمبرمج واش متواصل ولا قليل إنطلاقا من هاد الجدول اللي كايمثل سنة كاملة و كل يوم ب مربع و على حسب عدد ل commits اللي كادير كل يوم , داك المربع كايتلون بتدرج باللون الأخضر.

2️⃣ فتح حساب في Github :

فتح الحساب سهل و مجاني , ماعليك غير تمشي لهاد الموقع و تتبع التعليمات.

3️⃣ إثبات الهوية :

باش تنشر المشاريع ديالك في Github و تواصل التعديل و التطوير بطريقة سلسة و سريعة, خاصك تستعمل Terminal, ولكن باش دير هادشي خاصك تتبث ل Github بلي أنت صاحب داك الحساب.

كاينين العديد من الطرق باش تتبث الهوية ديالك, فهاد المقال غانشوفو كيفاش تتبث الهوية بإستعمال SSH KEY. غانقومو بإنتاج public و Keys private. (خاصك تكون مثبت Git فالحاسوب ديالك).

• غاتشغل برنامج Git Bash.

• إنتاج public و Keys private.

ثم غاتكتب هاد الأمر و بدل [email protected] بالإميل باش فتحتي حساب Github.

ssh-keygen -t ed25519 -C "[email protected]"

غايطلب منك تحدد المكان فين بغيتي تحط هاد المفاتيح أو توافق على المكان اللي حدد هو بالضغط على Enter. ثم غايطلب منك تكتب passphrase (غير إجبارية). النتيجة غاتكون على هاد الشكل :

هداك العنوان اللي مسطر عليه بالأحمر هو عنوان المجلد فين تحطو المفاتيح, بالنسبة ليك غايكون مختالف على اللي فالصورة. ملي غادخل لداك المجلد غاتقوم بفتح الملف اللي كايسالي ب pub. بإستعمال برنامج اللي كايقرا النصوص. غاتلقى شي كتابة بحال هاد الشكل, ديرلها نسخ Copy.

• إعطاء ال Public Key ل Github :

دبا غانعطيو هاد ل public key l ل Github باش تتعرف عليك في كل مرة كاتبغي دير شي تغيير و لا تحط شي حاجة فالحساب ديالك.

غاتمشي لهاد الموقع و غاتضغظ على New SSH key

غاطلعليك هاد الصفحة 👇

في title كتب أي إسم كيف ما كان و في Key حط ديك Public key اللي نسختي من قبل. و ضغط على Add SSH key.

4️⃣ إرسال المشروع إلى Github :

قبل ما نحطو الملفات خاصنا نديرو في Github مشروع أو Repository جديد.

غادخل لموقع Github , في الجانب الأيسر في الأعلا غاتلقا علامة زائد + بجانب الصورة ديال الحساب, ضغط عليها غاطلعليك قائمة , ثم ضغط على New repository.

من بعد غاطلعليك صفحة جديدة, كتب العنوان و الوصف ديال المشروع و ثم ختار واش المشروع علني و لا خاص و برك على Create repository. كيف ما كاتشوفو فالصورة.

الأن غاطلعليك هاد الصفحة اللي فيها الأوامر اللي غاتحتاج باش ترسل المشروع ديالك ل Github.

الأن المرحلة الأخيرة. غاتفتح Terminal و غاتمشي فين كاين المشروع ديالك و غاتنفد دوك الأوامر اللي كايبانوليك فالصورة.

• نبداو بهاد الأمر باش نضيفو git للمشروع

git init

• ثم هاد الأمر

git add .

هاد git add كانضيفو بها الملفات ل git حنا بغينا نضيفو جميع الملفات لذلك غانبدلو README.md بنقطة .

• الأن غانشؤو commit بإستخدام هاد الأمر :

git commit -m "first commit"

• ثم غانحددو ل Branch فاش غانخدمو :

git branch -M main

• ألان غانربطو هاد المشروع اللي فالحاسوب بالمشروع الجديد اللي درنا في Github بإستعمال هاد الأمر.

git remote add origin [email protected]:إسم-المشروع/إسم-حسابك

• الأن غانرسلو الملفات ل Github :

git push -u origin main

النهاية :

باش تعلم خاصك تخدم, لذلك تبع مع المقال و نفذ داكشي خطوة ب خطوة , وإلى عندك شي تساؤل أو إستفسار رسلو لينا عبر الصفحة ديالنا في Facebook.