بزاف ديال الناس كايبغيو إتعلمو البرمجة سواء التعلم الداتي أو في المدرسة, لكن المشكل اللي كايكون عندهم هو الخوف من عدم القدرة على المواصلة و غايلقاو راسهم ضيعو الوقت و لفلوس بدون فائدة.
كاينين بزاف ديال المغالطات بشأن القدرة على تعلم البرمجة. بزاف ديال الأشخاص كاينشرو هاد المغالطات و كايقولو بأنه باش تعلم البرمجة خاصك نسبة من الذكاء عالية و خاصك تكون مجهد في الرياضيات .....
فعلا البرمجة صعيبة و فعلا ماشي أي واحد قادر إكون مبرمج, بحالها بحال أي حرفة خاصك تبدل مجهود و تستتمر وقتك. أي حرفة كيف ما كان نوعها إلى بغيتي تعلمها خاصك تكون كاتبغيها بعدا, حيت داك الحب هو اللي غايساعدك باش تصبر و تستمر و تعطي.
بزاف ديال الناس قالولي أنهم بداو إتعلمو البرمجة لكن ما قدروش إكملو حيت جاتهم صعيبة, لكن الحقيقة هي أنهم هوما اللي ما بغاوش إتعلمو حيت بكل بساطة ما كاتناسبش الشخصية ديالهم. حيت ماشي أي واحد إقدر إجلس قدام الحاسوب لمدة 12 ساعة أو أكثر, ماشي أي واحد قادر إصبر على سخونية الراس اللي كاتجيك ملي شي حاجة مكاتبغيش تخدم و ما عرفتيش علاش, هنا نقدرو نقولو أنه إلى بغيتي تعلم البرمجة خاص إكونو عندك 2 حوايج.
1- القدرة على أنك تجلس أمام الحاسوب لمدة 12 ساعة أو أكثر.
2- système de refroidissement ديال راسك و أعصابك خاصو إكون مجهد . بالدارجة خاصك ما تكونش دغيا كايسخن عليك راسك و كاتعصب.
إلى كانو فيك هاد 2 حوايج فأنت قادر تولي مبرمج.
المشكل اللي كايطيح فيه أي مبتدأ هو الخوف من كثرة الأشياء اللي خاصو يتعلم و هادشي راجع للمغالطات اللي كاينين و اللي كاينشروهوم الناس, فحين ان الحقيقة هي العكس. مثلا شي واحد باغي يتعلم ل web ملي كايبحث كايلقا بلي خاصو يتعلم html و css و javascript و php و nodejs و react و angular و bootstrap و .... لكن في الحقيقة إلى تعلمتي غير html و css و javascript غاتولي قادر تقاد مواقع إلكترونية و بنسبة لداكشي لاخر, إلى تعلمتيه را غايعونك باش تبني داكشي اللي باغي بسرعة و بإحترافية. و أيضا كاينين شي حوايج مخاصكش تعلمهم, مثلا أنت باغي تخدم ل frontend مكاين لاش تعلم php أو nodejs أو إلى تعلمتي react مكاين لاش تعلم angular ...
خاصك تعرف الكترة ديال الأدوات هي فصالحك كمبرمج باش تبني داكشي اللي باغي بسهولة و إحترافية. الأدوات كتار و دائما كاين الجديد لكن را أي حرفة هاكا, مثلا الطبخ را باش تكون طباخ واعر خاصك دائما تتبع الجديد و تجرب الوصفات, هادي تصدق و هادي ما تصدقش.
و أهم حاجة هي عمرك ما تقارن راسك بناس أخرين حيت دائما كاين اللي حسن منك ولكن حسن منك حيت خدم مشاريع كتار و غلط بزاف و ستافد من الأغلاط ديالو. البرمجة شحال ما قداميتي فيها كاتمجهد و كاتعلم كتر. البارح طليت على ل code ديال واحد التطبيق كنت قاديتو عماين هادي , ملي بديت كانقرا ل code تخلعت من الرداءة ديال داكشي اللي كتبت حيت بكل بساطة طورت راسي و الكمية ديال المشاريع اللي خدمت هي اللي خلاتني نتعلم كتر.
و باش نكونو واقعيين را ما كاتهم لا برمجة ولا حتا حرفة من غيرها. اللي كايهم هو القدرة ديالك على تحقيق دخل من ديك الحرفة. إلى كنتي كادخل لفلوس هداك هو المهم.
بطبيعة الحال البرمجة عندها أفاق كبيرة و إستعمالات كتيرة لكن ماشي كلشي قادر إستغل داكشي اللي عندو باش يبني شي حاجة اللي دخل ليه لفلوس و بالإضافة لأنه البرمجة بوحدها ما توكلكش لخبز . حيت ملي غاتبني شي منتوج غايخصك دير ليه التسويق Marketing, و التسويق بحد داتو علم كبير.
ما تملش و صبر و واصل و كن متأكد انك غا توصل, حتا حاجة ما فابور, خاصك تستتمر الوقت و الجهد و الصبر و أهم شيء هو الإستمرارية. إلى عيتي خود وقت رتاح ما تحاولش تضغط على راسك. الدماغ كايوصل لواحد المرحلة مكايبغي إبقا يشد والو , يعني خاصك تعطيه الراحة, سير تفرج فشي فيلم نعس رتاح خرج بدل الجو. وقت الراحة إقدر يوصل لأسبوع ماشي بالضرورة ساعة أو يوم.
و خلاصة القول دائما نشر داكشي اللي تعلمتي و إلى و حلتي سول واخا إقوليك شي واحد السؤال ديالك بليد ما تسوقش ليه. دائما غاتلقا اللي إجاوبك و يوريك الطريق. و حنا في darija.dev دائما كاينين باش نجوبوك. هاد المقال الدار من أجل التشجيع و التوعية, حيت حتا انا ملي بديت نتعلم خصرت وقت و جهد باش نلقا الطريق منين نبدا و فشلت و عاود رجعت, ما لقيتش اللي إعاوني او إشجعني لكن الإستمرارية و الصبر خلاتني نوصل و نحقق شحال من حاجة. و كيف ما أنا وصلت حتا أنت قادر توصل و قادر تحقق إنجازات.
